Date/Time
Date(s) - 14/04/2019 - 15/04/2019
All Day
非牟利 Hellodog Foundation 於今年4月13至14日假西九龍文化區苗圃公園舉行了「Hellodog Fest 2019 」寵物狂歡節，提供各式各樣精彩節目，集舞台 show、狗隻專業按摩、寵物健康講座、狗隻行為工作坊、沐浴汽泡彈手製工作坊、市集、親子及人寵互動、面部彩繪、狗隻領養日於一身！是次寵物狂歡節主題為 born unequal, but love conquers，藉以宣揚「用愛征服不平等」的訊息。
Hellodog Foundation 創辦人 Sarah Li 表示：「 每天有太多狗隻不被善待、被遺棄、甚至被殺害；也有太多人只憑品種、年齡、顏色等外在因素去決定一隻狗狗愛與被愛的權利。其實每一隻毛小孩都有一顆值得被愛的靈魂，因此我希望透過 Hellodog Foundation 及首次主辦這個寵物狂歡節，讓更多公眾有機會接觸不同背景、不同品種的狗隻和分享有關飼養狗隻的護理資訊等，藉以宣揚「用愛征服不平等 born unequal, but love conquers」的訊息，同時為愛狗人士、狗主帶來人寵共融的快樂時光！」
是次寵物狂歡節重頭戲必數 Runway Show 人狗舞台盛事，集合星級嘉賓帶同領養愛犬，網上招募的人狗組合模特兒，及多隻來自救狗之家 (HKDR)、保護動物慈善協會(LAP)、Sai Kung Stray Friends Foundation 及愛護動物協會 (SPCA) 的待領養狗隻。
各模特兒走上伸展台的同時，大會司儀透過分享他們的獨特故事，展現狗隻的內在和外在美，宣揚大愛精神及支持領養的訊息。
Utah Lee，全家總動員及 Yogi
作為健身專家嘅 Utah 同老公鐘情於領養狗隻。今日帶來嘅 Yogi 係佢地領養返嚟嘅其中一隻。由初初飽受壓力冇屋企嘅情況，至到而家體能fit到同佢屋企人一樣，可以通山跑。愛，有能力改變一切。
Richie + Lily Kul
任職模特兒及演員嘅 Richie 係純素食者，維護動物權益嘅活躍分子。其實 Richie 比狗咬過，怕狗，直至佢姐姐喺美國出名殺狗嘅庇護所救出Lily之後俾佢養，佢對狗狗嘅愛就有增無減。亦開始利用自己嘅身份同佢姐姐一齊幫助更加多嘅動物，曾經與泰國狗隻庇護所 Soi Dog, 亞洲動物基金等團體合作。
Michelle + Lucky
身為模特兒嘅 Michelle 對狗狗愛心爆棚，有時幫 LAP 慈善機構做義工。直至依家為止，佢收養左5隻狗狗。今日佢帶咗六歲嘅 Lucky 嚟分享故事。Lucky 原本係流浪狗，有次 Michelle 喺屋企附近見到 Lucky 俾車撞，就即刻送佢去醫院接受治療，收養咗佢。呢次交通意外令 Lucky 要截肢，亦對去街及車聲產生恐懼，呢啲我哋認為係「殘疾」對 Lucky 嚟講並不是一回事，無阻佢享受生活！
旨呈 + 飛女
男子樂隊享樂團 3Think 主音旨呈 Andy 由細到大都好鍾意狗，養過超過5隻唔同品種性格嘅狗。愛狗如命嘅佢，關於飛女最難忘嘅經歷莫過於有一次飛女玩襪玩到成隻襪呑咗。Andy詢問完獸醫朋友之後知道最好喺黃金3小時內令佢嘔返隻襪出嚟。上網搵資料催嘔又發覺啲資料唔正確靠唔住，最終搵廿四小時診所幫手。提醒大家，狗狗有不同性格癖好，最好將狗仔唔食得嘅所有嘢收好。
人狗組合模特兒
Roseann + Anna + Elsa + Kipper (待領養唐狗 Kipper 被暫托中)
有養過雪橇嘅狗主會知道要花嘅心力同時間係好多，新手 Roseann 完全唔知咩係雪橇，亦唔知雪橇難養度指數係極高。 雪橇 Elsa 係因為狗場倒閉唯一無人要嘅狗狗；Anna 係 Elsa 同父同母既妹妹，有皮膚問題，比前主人虐待被救出。Roseann 冇諗過佢地破壞力驚人，電視機、相機 、靚鞋、沙發都被摧毀。但係 Roseann 完全冇放棄嘅念頭，反而覺得有 Anna 同 Elsa 係佢嘅幸運，亦開始暫養其他狗隻。暫養中 Kipper 成熟乖巧，靜心等待一個家。
Yumi + 𡃁仔
狗狗𡃁仔係 Yumi 從一位已絕交的朋友領養回來的，𡃁仔以前常被困籠，身體發臭，唔識行路。Yumi 好記得第一次帶佢散步，佢終於識跑，嗰一刻只有感動。由養佢一那刻，Yumi 就知道要負責佢一世。2018年1月佢確診患上脊椎盤突出，下半身四級癱瘓， Yumi 從來冇打算放棄，讓𡃁仔接受手術治療。養寵物，係無論順境逆境，都一樣愛惜。
Upendra Rao, Maitreyi Karanth + Demi
13歲嘅 Demi 而家開心有人錫，其實佢之前嘅生活慘不忍睹。被放養嘅佢住係垃圾堆成年，24小時被人用鐵鏈捆綁住，冇瓦遮頭。Upendra 太太睇到網上有「walk Demi」嘅請求，就開始帶 Demi 行街。收養佢係最自然不過嘅事，而家 Demi 同屋企5隻狗狗一齊瞓係主人床上嘆世界。狗狗唔係囚犯，亦唔應該被剝奪生存嘅權利。
吳小姐 + 貝貝
吳小姐嘅朋友在狗場救出一隻作為繁殖但生殖機能衰退而遭到場主放棄嘅芝娃娃。吳小姐記得第一眼的震撼，“貝貝”情況比佢想像的更嚴重，非常細小虛弱的身驅，乳房全腫脹鬆弛，腳掌通紅，指甲及眼睛佈滿分泌物，甚至看不見佢眼球，而那雙幼小手腳不由自主的不斷氈抖。想像不到這弱少身驅承受過幾多痛苦？貝貝一天一點慢慢地對家人建立信任。
Dennis + 岑九
岑九係被前主人遺棄嘅小可憐，而家成為 Dennis 屋企嘅一份子。領養佢返嚟之後，發現佢對外界嘅聲音好敏感，又因佢矮小，見對比自己嘅大狗會先聲奪人，雖然經過訓練，吠叫仍未有太大改變，但這不會令 Dennis 同屋企人對佢嘅愛減少。若不是領養岑九，Dennis 根本唔會知道有暫托家庭這個義工崗位，更加唔會開始照顧初生狗bb同埋待產倉鼠。
Rick + Oscar
Rick 以前好驚狗，因為佢比狗咬過！記得九年前有一日佢決定要克服對狗隻嘅恐懼，從此以後，Oscar 就成為咗佢屋企人，亦令 Rick 變得更有責任感。為解決 Oscar 嘅敏感皮膚問題，Rick 放棄咗健身教練嘅工作，開發只含天然成分嘅有機寵物洗髮水等護理產品。
來自動物救援組織的待領養狗隻
如有興趣深入了解及考慮領養以下狗狗，請直接聯絡該動物救援組織。
Narelle Pamuk ＋ Indy (西貢流浪朋友基金會 SKFFF)
西貢流浪朋友基金會嘅創始人 Narelle Pamuk 和 Indy。Indy 以前係倉狗，困喺建築物之間非常骯髒嘅地方，冇乾淨食水，冇藏身之所。Narelle 營運庇護所已有14年，現時收留咗120隻無家可歸嘅狗狗。對於Narelle 來說，狗狗特別珍貴，因為佢地非常忠心，有愛，深情，寬容，這些都是值得人類學習嘅素質。
Unar (保護動物慈善協會 LAP)
Unar被遺棄係旺角一個單位内，被拯救時嚴重缺水，骨瘦如柴，體重只得6kg以下，頻臨死亡邊緣。經過三個月嘅悉心照顧同愛護，佢終於長返肉同恢復健康。我地發現原來Unar係披有柴犬及哥基犬嘅毛髮！佢係一隻忠心又可愛嘅狗狗，你願意給它一個家嗎？
Tuberose (保護動物慈善協會 LAP)
騎士查理王小獵犬 King Charles Spaniel 喺香港係十分搶手嘅品種。可是亦因為咁，佢哋成為咗寵物交易嘅受害者。當我們接到 Tuberose 那天，佢廋到得棚骨嘅身體不斷顫抖，身上差唔多無毛，最可憐嘅係她隻眼差點要掉出來，獸醫話要移除，肚皮亦有個脂肪腫瘤。牙因為食得太差，營養唔夠，生育太多，都壞了，剝掉九隻。雖然她經歷了六年的惡夢，每天喺籠裹，無朋友，剩係生育；但而家喺暫託家庭裹，很快就活躍開心番。証明狗狗只要有愛，有足夠的糧食就可以好番。佢人狗都咁鐘意，只係等緊一個愛佢嘅家出現。
Tuberose (保護動物慈善協會 LAP)
4歲半阿Ted喺義工心目中有一個好特別嘅地位。阿Ted喺2017年喺船廠救出，當時頭、頸部同埋約四分一部分嘅身體，全部都係生歐歐嘅蟲同血洞，慘不忍睹。他初回來時只敢留喺自己房，唔俾任何人接近，情緒好低落。之後，他仲要受牛痺熱，心絲蟲，胰臟炎煎熬，用好多金錢、心機和時間，都醫好了。差不多兩年啦，阿Ted仲等緊，這個人會係你嗎？
Jasmine (救狗之家 HKDR)
狗狗 Typhoon BB時喺一個颱風日黎到 Hong Kong Dog Rescue，所以叫做 Typhoon。佢細細個嘅時候耳仔已經好大對，同而家一樣咁可愛。佢又唔怕羞又親人，可惜佢一直都未有機會俾人領養。早幾年仲因為扭親腳，要做一個大手術，我哋本來好擔心佢咁大隻，又鍾意跑跑跳跳，會好難復原。好彩多得職員同義工嘅悉心照顧，佢而家已經康復晒，佢行得咁好，係咪睇唔出佢受過傷呢？我哋依家繼續每日餵佢食補關節既營養丸，希望佢繼續健健康康，快啲有人領養佢返屋企啦！
Mia (救狗之家 HKDR)
Mia細細個就嚟咗HKDR，佢嗰陣時瘦好多，細細粒。而家長大左有咩唔同？除咗肉多咗，就係更加嗲人。佢嘅絕招就係扭 pat pat，每次見到有義工，佢條尾巴都會搖到唔識停。佢亦都係一隻 PR 狗狗，每次我哋有新拯救返嚟嘅狗狗都會派Mia做代表去歡迎佢哋，等佢地知道領養中心並唔可怕。不過由於佢細細個已經係領養中心，習慣同一大班狗狗朋友同義工一齊生活，有次佢返到暫托人屋企，驚到匿埋喺浴缸幾日。希望佢將來嘅領養者會有足夠嘅耐性同埋愛心去令Mia習慣，知道做住家狗既好啦。
Sean (救狗之家 HKDR)
Sean 最得意就係堂八字眉，每次佢好認真等嘢食，就會出現㗎啦。佢又白雪雪又得意，點解都會等咁耐呢？實不相暪，其實佢以前有啲怕醜同敏感，唔係咁中意比人摸來摸去。多得職員同義工嘅循循善誘，佢先越嚟越習慣親人。依家見到有人行近佢都會擺尾想你摸佢。其實救狗之家入面，有好多類似Sean嘅狗狗，剛拯救返嚟會因為唔習慣而緊張或怕醜，好彩我地係一個不殺既機構，有啲狗狗未必好似Sean咁快適應，可能要用幾年以上既時間先會信任人類，我地都會比足夠時間同空間佢地慢慢黎。
Dina (愛護動物協會 SPCA)
上年十月愛協督察喺一棵倒塌咗嘅樹洞裹面搵到當時只有一個月大嘅 Dino，因為年紀太少缺乏自我照顧能力，所以我地帶咗佢返協會做身體檢查，然後由暫養父母照顧了一個月，正式踏上尋家之旅。Dino 係隻非常活潑好動嘅細路仔，學習能力好強，而玩耍時亦非常投入，但可能因為年紀比較小，有時候分寸未能掌握得好好，有機會嚇怕其他狗狗甚至係小朋友，我地希望幫佢搵到願意花時間對佢循循善誘嘅家庭。
Kasper (愛護動物協會 SPCA)
今年二月有市民發現唐狗 Kasper 遭貨車輾過，右前腳嚴重受傷。愛協督察即時前往營救，雖然喺 Kasper 身上未有發現晶片，但佢戴有頸圈，初步估計佢係有主人嘅。可惜始終冇人來認領，愛協獸醫觀察到 Kasper 右前腳病情每況愈下，所以決定為佢進行截肢手術，避免繼續惡化。Kasper 喺愛協職員嘅悉心照顧下，已經逐漸康復過來。儘管失去咗一隻腳，Kasper 仍然樂觀積極地面對生活。每當見到人走近，佢都會汪汪汪咁打招呼。
Bookings
Bookings are closed for this event.
